TGÝMJ-niň Akdepe etrap wekili we “Güneş” ýaşlar merkeziniň meýletinçileri tarapyndan, çagalaryň şahsy arassaçylygy berjaý etmegiň we onuň saglyga täsiriniň ähmiýeti barada habarlylygyny ýokarlandyrmak maksady bilen, etrabyň 19-njy çagalar bagynyň çagalarynyň arasynda “Arassaçylyk, şahsy arassaçylyk” mowzugy boýunça okuw sapagy geçirildi. Okuw sapagy interaktiw söhbetdeşlik bilen başlandy, onda çagalar arassaçylygyň düzgünleri boýunça öz bilimlerini paýlaşdylar. Soňra şahsy arassaçylyk düzgünleriniň esasy ýörelgeleri aýdylyp, ýagny eliňi ýygy-ýygydan sabyn bilen ýuwmak, günde iki gezek diş arassalamak, egin-eşikleriňi we aýakgaplaryň arassa saklanmagy, sowuklamalaryň we ýokanç keselleriň öňüni almak üçin şahsy arassaçylygyň ähmiýeti, dogry iýmitlenmek we onuň saglyga ýetirýän täsiri barada giňden gürrüňler edildi.  Çagalar dogry el ýuwmak we diş arassalama usullaryny görkezmäge çalyşdylar. Şeýle hem, olar arassaçylyk boýunça sorag-jogap oýnuna gatnaşyp, öz bilimlerini barlamak we peýdaly maslahatlar almak mümkinçiligine eýe boldular. Çagalar bu mowzuga uly gyzyklanma bildirip, sorag-jogaplar alyşyp işjeň gatnaşdylar. Şeýle geçirilýän çäreler, çagalaryň sagdyn endiklerini emele getirmegine, saglygyna bolan jogapkärçiligini ýokarlandyrmaga we keselleriň öňüni alyş çärelerini güýçlendirmegine uly kömek berer diýip umyt edýäris.