2025-nji ýyl üçin Türkmenistanyň Bilim ministrligi bilen BMG-niň Çagalar gaznasynyň (ÝUNICEF) bilelikdäki iş meýilnamasynyň hem-de ÝUNICEF bilen Türkmenistanyň Gyzyl Ýarymaý Milli jemgyýetiniň bilelikdäki “Merkezi Aziýanyň ýer titremelere we tebigy betbagtçylyklara ýokary töwekgelçiligi bolan ýurtlarynda ýerli we milli derejesinde adatdan daşary ýagdaýlara taýýarlygy we jogap beriş mümkinçiliklerini güýçlendirmek” maksatnamasynyň çäginde 2025-nji ýylyň 15–16-njy maýynda Daşoguz şäheriniň 25-nji, 29-njy we 36-njy orta mekdeplerinde okuw maslahatlary geçirildi. Bu çäreler ýerli häkimiýetleriň, maksatnamanyň amala aşyrylýan mekdepleriň müdirleriniň we mugallymlarynyň, şeýle hem TGÝMJ-niň Daşoguz welaýat bölüminiň işgärleriniň we meýletinçileriniň gatnaşmagynda geçirildi. Okuw maslahatlarynyň esasy maksady mekdeplerde we ýerli jemgyýetlerde adatdan daşary ýagdaýlara taýýarlygy ýokarlandyrmak hem-de ilkinji kömegi bermek boýunça bilimleri we başarnyklary artdyrmakdan ybarat boldy.Okuw maslahatlary ÝUNICEF-iň milli maslahatçysy tarapyndan, adatdan daşary ýagdaýlar, howanyň üýtgemegi we betbagtçylyklaryň töwekgelçiligini azaltmak meseleleri boýunça ÝUNICEF-iň hünärmeni we Türkmenistanyň Goranmak ministrligi bilen bilelikdäki hyzmatdaşlygyň esasynda guraldy. Bu çäreler okuwçylaryň we ýerli jemgyýetleriň howpsuzlyk medeniýetini ösdürmäge we durnuklylygyny ýokarlandyrmaga möhüm goşant boldy.
