Türkmenistanyň Gyzyl Ýarymaý Milli jemgyýetiniň Lebap welaýat bölümi elmydama raýatlaryň bilim derejesini kämilleşdirmek, ösüp gelýän ýaş nesillerimizi ata-babalarymyzdan gelýän milli ýol-ýörelgelerine esaslanyp terbiýelemek, ahlak arassalygy, maşgalany gorap saklamak, arassaçylygy berjaý etmek, beden we ruhy taýdan sagdyn nesili kemala getirmek, ulyny sylamak - kiçini söýmek ýaly bilim-terbiýe beriji öwüt-ündew we amaly okuw çäreleri halkyň arasynda yzygiderli geçirýär. Şeýle çäreleri göwnejaý, ussatlyk bilen geçirmek, okuwlary gowy hilli alyp barmak üçin bolsa geçirilýän okuwlar boýunça dünýä ülňülerine gabat gelýän täze gollanmalary ulanmaly we amaly tälim beriş ýollary bilen öz-özüňi kämilleşdirmek, gurplandyrmak we tejribe toplamak derwaýys bolup durýar. Şu nukdar nazardan Türkmenistanyň Gyzyl Ýarymaý Milli jemgyýetiniň Lebap welaýat bölümi ýurdumyzda öň Hormatly Arkadagymyz tarapyndan yglan edilen aprel aýynyň 1-30-y aralygynda “Sagdynlyk we bagtyýarlyk” atly köpçülikleýin bedenterbiýe-sport we sagdyn durmuş medeni çäreleriň bir aýlygynyň çäklerinde, “Halkara parahatçylyk we ynanyşmak ýyly” ady berilen 2025-nji ýylyň aprel aýynyň 14-17-si aralygynda Milli jemgyýetiň ähli welaýat bölümlerinde dürli ugurda zähmet çekýän işgärlerinden we meýletinçilerinden düzülen topar bilen Lebap welaýatynyň Köýtendag etrabynyň Köýten obasynda “Adatdan daşary ýagdaýlara taýýarlyk” we “Lukmandan deslapky ilkinji kömek bermegiň endikleri” boýunça dört günlik amaly sport tälim beriş okuwyny geçirip geldi. Häzirki döwrüň talaplaryna laýyklykda abzallaşdyrylan otagda gurnalan tapgyrlaýyn dört günlik amaly okuw çäresi diýseň täsirli hem gyzykly geçdi. Tebigatyň täsiri ýa-da çölde, suwda we himiki partlaýjy maddalaryň täsirinde, ýertitremelerde, toprak süýşmelerinde duş gelip biläýjek her bir hadysa barada aýratyn aýdylyp geçildi. Adatdan daşary hadysa netijesinde ejir çekenleri halas etmek üçin lukmanlar gelmezinden öň lukmançylykda ulanylýan serişdeler tapylmadyk halatynda gol aşagynda bar zatlardan ýerlikli we dogry peýdalanmagyň usullary görkezildi. Her bir adamyň durmuşynda gabat gelip biläýjek dürli betbagtçylyklarda ejir çekene ilkinji gaýragoýulmasyz kömegi bermegiň dogry ýollary prizentasiýalar we amallar arkaly giňişleýin düşündirmek bilen bu ugurda bilimleri kämilleşdirildi. Başarmaklyk ol özüňe bolan ynam döredýär. Bu bolsa gaýragoýulmasyz ýagdaglar ýüze çykan halatynda netijeli özüňi alyp barmaklygy çözýär. Adamyň ömrüni halas edip, saglygyny gorap saklamaga gönükdirilen kömegi bermegiň dogry ýollaryny bilmek her birimiziň borjumyzdyr.
