Bütin dünýäde ekologiýa babatynda  howanyň üýtgemegi bilen baglanyşykly işler alnyp barylýar. Bu ugurda Ýurdumyzda Milli Liderimiz Gahryman Arkadagymyzyň, Arkadagly Gahryman Serdarymyzyň başda durmagynda howanyň üýtgemegi netijesinde ekologiýany arassa saklamak ugrunda giň-gerimli zerur işler durmuşa ornaşdyrylýar. Muňa baglylykda Arkadagly Gahryman Serdarymyzyň pähimli sözlerinden ugur alyp, Türkmenistanyň Gyzyl Ýarymaý Milli jemgyýeti hem 2024-nji ýylyň 1-nji ýanwaryndan BMG-niň Çagalar Gaznasy (UNICEF) bilen bilelikde “Ýer titremäniň we tebigy betbagtçylyklaryň töwekgelçiligi ýokary bolan Merkezi Aziýa ýurtlarynda adatdan daşary ýagdaýlara taýýarlygy üpjün etmek we olara jogap bermek boýunça ýerli we milli mümkinçilikleri” ady bilen taslama meýilleşdiripdi. Asuda ýurdumyzda halkymyzyň howpsuz, arkaýyn durmuşda erkana ýaşamagyny gazanmakda tassyklanan meýilnama laýyklykda dürli ulgamlardaky wekilleriň gatnaşmagynda ýerlerde derwaýys çäreleriň geçirilmegi dowam edýär. Ady agzalan taslamanyň çäginde şu ýylyň oktýabr aýynyň 07-de milli konsultantlar tarapyndan welaýatyň Türkmenabat şäherindäki 29-njy daşary ýurt dillerine ýöriteleşdirilen orta mekdebinde we Çärjew etrabynda ýerleşýän 58-nji orta mekdebinde mugallymlaryň we okuwçylaryň hem-de Lebap welaýat raýat goranyş we halas ediş işleri müdirliginiň hünärmenleriniň gatnaşmagynda usuly okuw maslahaty geçirildi.  Halkymyzy, ýaş neslimizi döräp biläýjek adatdan daşary ýagdaýlara, tebigy betbagtçylyklara hem-de tehnogen hadysalara taýýarlamak, olary wagtynda habarly etmek, olaryň taýýarlygyny ýokarlandyrmak, şol ýagdaýlarda özüňi alyp barmaklygy we lukmandan deslapky ilkinji kömegi bermekligiň düzgünlerini öwretmek halkymyzyň röwşen gelejegi üçin bähbitlidir. Bu kämilleşdiriş okuw çäreleri bir hepde dowam eder.