Berkarar döwletiň täze eýýamynyň Galkynyşy döwründe Gahryman Arkadagymyzyň we Arkadagly Serdarymyzyň baştutanlygynda ýurdumyzda ynsanperwerlik, mähir-şepagat we halal zähmet iň ýokary gymmatlyklara öwrüldi. Şeýle bagtyýar döwürde ynsan saglygyny goramak, jemgyýetimize peýda getirmek we ynsanperwerlik ýörelgelerini dabaralandyrmak ugrunda zähmet çekmek uly mertebedir.

Men, Ogulhally Badaýewa, öz zähmet ýolumu Türkmenistanyň Gyzyl Ýarymaý Milli jemgyýeti bilen baglap, köp ýyllaryň dowamynda halkymyzyň bähbidine hyzmat edip gelýärin. Biziň jemgyýetimiziň her bir işi ynsanperwerlige, goldawa we adamlara kömek elini uzatmaga gönükdirilendir. Edýän işlerimiziň halkymyz tarapyndan gyzgyn garşylanmagy we döwletimiz tarapyndan goldanylmagy bize hemişe täze güýç we galkynyş berýär.

Düýn meniň durmuşymda iň ýatda galyjy we buýsançly günleriň biri boldy. Türkmenistanyň Prezidentiniň Permany bilen meniň çeken azajyk zähmetime ýokary baha berlip, «Watana bolan söýgüsi üçin» medaly bilen sylaglanyldym. Bu mertebeli sylag diňe bir meniň däl, eýsem, agzybir we zähmetsöýer Türkmenistanyň Gyzyl Ýarymaý Milli jemgyýetiniň tutuş agzalarynyň, biziň uly toparymyzyň çeken bilelikdäki zähmetiniň ýokary sarpasydyr.

Döwlet sylagyny döşüme dakynan pursadymda kalbymy gurşan şatlygy, Watanyma we halkyma bolan wepalylyk duýgusyny söz bilen beýan etmek kyn. Bu medal meni mundan beýläk-de has tutanýerli zähmet çekmäge, halkymyzyň saglygy we abadançylygy ugrunda jançekerli hyzmat etmäge ruhlandyrýar.

Bize şeýle bagtyýar döwürde ýaşap, halal zähmet çekmäge we zähmetimiziň hözirini görmäge giň mümkinçilikleri döredip berýän Türkmen halkynyň Milli Lideri Gahryman Arkadagymyza we Hormatly Prezidentimiz Arkadagly Serdarymyza tüýs ýürekden çykýan minnetdarlygymy we iň hoşniýetli arzuwlarymy bildirýärin! Watana bolan söýgimiz hemişe amallarymyzda dabaralansyn!

Ogulhally BADAÝEWA,
Türkmenistanyň Gyzyl Ýarymaý Milli jemgyýetiniň Işgärler bölüminiň baş hünärmeni.