30-njy iýun 5-nji awgust aralygynda Türkmenistanyň Gyzyl Ýarymaý Milli jemgyýetiniň meýletinçileri Türkiýede ýerleşýän gözel Heýbeliada adasynda geçirilen halkara höweslendiriji we bilim beriji lagera gatnaşdylar. Milli jemgyýetleriň beýleki döwletlerden gelen meýletinçi wekiliýetleriniň arasynda Türkiýäniň, Demirgazyk Kipriň, Gazagystanyň, Gyrgyzystanyň, Özbegistanyň we Azerbaýjanyň Gyzyl Ýarymaý jemgyýetleriniň, şeýle hem Wengriýanyň Gyzyl Haç jemgyýetiniň wekilleri hem bardy. Lageriň gün tertibine giň okuw meýilnamasy, medeni çäreler we gezelençler girizildi, bu bolsa ony tejribe alyşmak we meýletinçi jemgyýetleriniň halkara gatnaşyklaryny pugtalandyrmak üçin möhüm meýdança öwürdi.
Lageriň bilim bölümi amaly türgenleşiklerden we interaktiw sessiýalardan ybarat boldy. Çykyş edenler tebigy betbagtçylyklara garşy göreş we howanyň üýtgemegi bilen baglanyşykly üstünlikli taslamalar barada maglumat berdiler; şeýle hem ynsanperwerlik we sosial iş, gan donorlyk merkezleriniň işi, şeýle-de adamlary meýletinçilik işine çekmek we olara okuw bermek boýunça Gönüllöl maglumat platformasy barada köp gyzykly zatlary bilmek mümkin boldy. Teoretiki material toparlaýyn ýumuşlar we keýs çözmek bilen utgaşdyryldy, bu bolsa diňe bir bilim almak däl-de, eýsem, ýagdaýlara görä döredilen şertlerde endikleri kämilleşdirmäge mümkinçilik berdi. Munuň özi bolsa meýletinçileriň öz milli jemgyýetlerindäki geljekki işleri üçin aýratyn peýdaly boldy.
Lageriň gün tertibiniň aýrylmaz bölegi medeni agşamlardan ybarat boldy, şol ýerde her bir meýletinçi delegasiýasy öz milli jemgyýetiniň işi hem-de wekilçilik edýän döwleti barada kiçi konsert we prezentasiýa taýýarlady. Aýdym-saz, tanslar we durmuşa geçirilen taslamalar barada gürrüňler arkaly meýletinçiler biri-birini has gowy tanadylar, şahsy aragatnaşyklar ýola goýuldy we halkara meýletinçilik hyzmatdaşlygynyň esasy bolan agzybirlik duýgusy has-da pugtalandyryldy.
Şeýlelikde, Türkmenistanyň Gyzyl Ýarymaý Milli jemgyýetiniň topary milli türkmen tansy «Küştdepdi»-ni ýerine ýetirdi, «Gel Türkmenistan» atly aýdymy aýtdy we beýleki milli jemgyýetlerden gelen meýletinçilere hem-de lageriň ýolbaşçylaryna sowgat hökmünde ýadygärlik sowgatlaryny we Türkmenistandan getirilen däp-dessurly tagamlary gowşurdy.
Dynç alyş meýilnamasynyň çäginde guramaçylar Stambul şäheriniň taryhy we medeni ýadygärliklerine gezelençleri taýýarladylar. Gatnaşan meýletinçiler Topkapy köşgünde bolup, ýarag otagyny, hazynany we Mekgeden hem-de Medineden getirilip, ýerleşdirilen yslam mukaddes zatlarynyň saklanýan mukaddes dinler zalyny gezip gördüler. Aýasofiýa edilen gezelenç şäheriň birnäçe asyrlyk arhitektura taryhyna ýakyndan göz ýetirmäge mümkinçilik berdi, Ýerebatan (gark bolan köşk) ady bilen hem tanalýan Bazilika sisternasyna gezelenç hem-de Gülhane seýilgähinde aýlanmak bolsa meýilnama öwreniş we estetiki lezzet paýyny goşdy. Ýatda galyjy waka hökmünde Bosfor bogazynda we Marmar deňzinde gämide gezelenç meýletinçilere erkin ýagdaýda aragatnaşyk gurmaga we şäheri suwdan synlamaga mümkinçilik berdi.
Heybeliadadaky halkara lageri hünär taýdan okuwlary, tejribe alyşmagy we medeni gatnaşyklylygy utgaşdyrmagyň meýletinçilik başlangyçlarynyň ösüşi üçin berk binýady döredýändigini görkezdi. Şeýle çäreler, maslahatlar, lagerler diňe bir meýletinçileriň başarnyklaryny ýokarlandyrmak bilen çäklenmän, eýsem, halkara agzybirligini, dostlukly gatnaşyklary we geljekde netijeli jemgyýetçilik hem-de ynsanperwerlik işleriniň alnyp barylmagy üçin zerur bolan aragatnaşyklary-da pugtalandyrýar.
