Türkmenistanyň Gyzyl Ýarymaý Milli Jemgyýetiniň Mary welaýat Tagtabazar etrap bölüminiň işinde ileri tutulýan ugurlaryň biri-de maglumat ulgamydyr. Onuň bäş wezipesi: ilata Gyzyl Haç Hereketi we Jemgyýetiň işleri barada doly maglumaty bermek, onuň abraýyny hem-de beýleki guramalary we daşarky hyzmatdaşlar bilen özara gatnaşyklaryny ýokarlandyrmak, Gyzyl Ýarymaýyň işleri hakyndaky maglumatlary ilkinji nobatda ilatyň mätäçlik çekýän gatlagyna ýetirmek, şeýle hem adatdan daşary ýagdaýlarda we tebigy hadysalarda heläkçilige duçar bolanlara tiz kömek bermek üçin degişli edaralara habar bermekdir. Meýletinçiler hereketi – Gyzyl Haç Hereketiniň berk binýadydyr. Meýletinçiler bolsa – ähli Milli jemgyýetleriň, şol sanda Türkmenistanyň Gyzyl Ýarymaýyň işiniň esasy hereketlendiriji güýjidir. Häzirki wagtda ýurdumyzyň ähli ýerlerinde Jemgyýetiň meýletinçileri bar. Şäherde, welaýatlarda, etraplarda, obalarda ýüzlerçe meýletinçiler zähmet çekýär, olar ak göwünli we meýletinlik bilen öz güýjini we wagtyny mätäçlik çekýän adamlara sarp edýärler.