TGÝMJ-i tölegli esasynda Türkmenistanyň Içeri Işler ministligiň ýol gözegçilik gullugynyň işgärlerine ýol hadysasy dörän wagtynda adamlara lukmandan deslapky ilkinji kömegi bermegiň endiklerini öwretmek maksady bilen okuw tapgyryny geçirýär. Okuw tapgyry ýörite tassyklanan, Ýewropa ýurtlarynyň standartyna gabat gelýän okuw meýilnamasynyň esasynda geçirilýär. Okuw tapgyry bu maksat üçin ýörite enjamlaşdyrylan, okuw we görkezme esbaplary bilen üpjün edilen okuw otaglarynda geçirilýär.
Okuw wagtynda ýol gözegçilik gullygynyň işgärleri Milli jemgyýetiň ilkinji kömegi bermek boýunça okuw tapgyryny geçirmäge ygtyýrly hünärmenleri bilen bilelikde ýol hadysasy zerarly ejir çeken, şikes alan adamlara TIZ kömegi gelinçä, adamynyň ömrüni saklamaga ýardam berýän ilkinji kömegi bermegiň usullaryny we endiklerini öwrenýärler we ony ýörite okuw görkezme esbaplarynda amaly ulanmak bilen özleşdirýärler.
Özleşdirilen endikler ýol gözegçilik gullygynyň işgärlerine ýol hadysasy ýüze çykan mahalynda adamlara netijeli ilkinji kömegi öz wagtynda bermäge we adamlaryň ömrüni saklamaga mümkinçilik berýär.
Okuw tapgyrynyň soňunda, okuwyň netijesi boýunça 65 ball toplan hünärmenler okuwy doly özleşdiren hasaplanýarlar we olara Ýewropa standartyna laýyk gelýän ygtyýarnama berilýär.
