Güýz we gyş möwsüminiň başlanmagy bilen howanyň sowamagy netijesinde gyzdyryjy enjamlaryň giňden ulanylýan döwri başlanýar. Şunuň bilen baglylykda, öýlerde we iş ýerlerinde ýangyn howpsuzlygynyň düzgünlerine berk berjaý etmek aýratyn ähmiýete eýedir. Şunuň bilen baglylykda, 2025-nji ýylyň 15-nji noýabrynda Türkmenistanyň Gyzyl Ýarymaý Milli jemgyýetiniň Daşoguz welaýat bölüminiň işgärleriniň arasynda, Daşoguz welaýat Polisiýa müdirliginiň Ýangyn howpsuzlyk bölüminiň wekilleriniň gatnaşmagynda düşündiriş işleri geçirildi. Çäräniň  dowamynda hünärmenler gyzdyryjy enjamlaryň dogry we howpsuz ulanylyşy, elektrik simleriniň kadaly ýagdaýda saklanylmagy, hem-de ýangyn ýüze çykan halatynda nädip dogry hereket etmelidigi barada giňişleýin maglumat berdiler. Işgärler bilen geçirilen söhbetdeşlikde, öýlerde gaz ojaklarynyň, peçleriň we elektrik enjamlarynyň ulanylyşynda iň köp duş gelinýän ýalňyşlyklar hem agzalyp geçildi. Şeýle-de, ýangyn ýüze çykan ýagdaýda tiz habarly bolmak üçin degişli hyzmatlaryň telefon belgileri ýatladyldy. Şeýle çäreler halkyň arasynda howpsuzlygyň medeniýetini ýokarlandyrmakda we ýaşaýyş jaýlarynda, edara-kärhanalarda ýangyn töwekgelçiligini azaltmakda möhüm ähmiýete eýedir.