Düzüminde müňlerçe agzalary, meýletinçileri bolan Gyzyl Ýarymaý Milli jemgyýet gaýragoýulmasyz meseleleri çözmäge işjeň gatnaşyp, döwletiň kömekçileri bolup durýar. Ilatyň arasynda amaly-okuw maslahatlary, wagyz-nesihat çäreleri yzygider gurnaýan Milli jemgyýet Baky Bitarap Türkmenistan döwletinde halkyň saglygyny goramakda, olara durmuş taýdan goldaw bermekde, ýaşlary milli däp-dessurlaryň ruhunda terbiýelemekde we ynsanperwerlik gymmatlyklary ýaýratmakda Hormatly Prezidentimiziň öňde goýan maksatnamalarynyň durmuşa geçirilmeginde saldamly goşant goşýar. Muňa baglylykda Türkmenistanyň Gyzyl Ýarymaý Milli jemgyýeti bilen BMG-niň Çagalar Gaznasynyň (UNICEF) bilelikde “Ýer titremäniň we tebigy betbagtçylyklaryň töwekgelçiligi ýokary bolan Merkezi Aziýa ýurtlarynda adatdan daşary ýagdaýlara taýýarlygy üpjün etmek we olara jogap bermek boýunça ýerli we milli mümkinçilikleri” atly taslamasy hereket edýär. Bu ugurda watana, halkyna hyzmat berýän meýletinçi ýaşlarymyzyň taýýarlygyny ýokarlandyrmak, kämilleşdirmek, taslama boýunça olarda maglumat baýlygyny döretmek maksady bilen şu ýylyň oktýabr aýynyň 13-nde BMG-niň Çagalar Gaznasynyň (UNICEF) Türkmenistandaky milli wekilleri tarapyndan Milli jemgyýetiň welaýat bölüminde meýletinçileriň arasynda usuly okuw maslahaty geçirildi. Okuw çäresine meýletinçileriň 20 sanysy gatnaşdy.