Türkmenistanyň Gyzyl Ýarymaý Milli jemgyýeti tarapyndan  paýtagtyň “Laçyn” myhmanhanasynda gurnalan iki günlük iş maslahaty geçirildi. Duşuşygyň maksatnamasyndaky esasy mesele, bu guramanyň içerki resminamalaryny kämilleşdirmek we tassyklamak, ähli welaýatlary we etrap şahamçalary bir internet ulgamyna birleşdirmek. Şol sanda, sanly tehnologiýalary ornaşdyryp, elektron resminama dolanşugyna hem-de elektron şahsyýetnamalar ulgamyna geçmek, sanly ykdysadyýeti, elektron senagaty döretmek, sanly aragatnaşyk babatynda şäherleriň we obalaryň arasyndaky tapawudy aradan aýyrmak ýaly wezipeleri öňe sürülýär. Birleşmek işleri, türkmen halkynyň Milli Lideri Gurbanguly Berdimuhamedow tarapyndan başlanan  “Türkmenistanda  2019-2025-nji ýyllarda sanly ykdysadyýeti ösdürmegiň konsepsiýasyny” amala aşyrmagyň çäginde ýerine ýetirilýär. Bu bolsa döwrüň esasy talabydyr, biziň hem her birimiziň baş maksadymyzdyr.