TGÝMJ-niň Daşoguz welaýat bölüminiň hünärmenleri tarapyndan Daşoguz şäheriniň "Bagtyýar nesil" çagalar sagaldyş we dynç alyş merkezinde dynç alýan çagalaryň arasynda Türkmenistanyň tebigatynda ösýän dermanlyk ösümlikler hem-de olaryň adam saglygy üçin ähmiýeti barada wagyz-nesihat duşuşygy geçirildi. Duşuşygyň dowamynda hünärmenler ýurdumyzda ösýän dürli dermanlyk ösümlikleriň şypaly häsiýetleri, olaryň halk lukmançylygynda we sagdyn durmuş ýörelgesini berkitmekde eýeleýän orny barada giňişleýin gürrüň berdiler. Şeýle hem, Hormatly Arkadagymyzyň dermanlyk ösümliklere bagyşlanan gymmatly eserlerinde beýan edilýän ylmy maglumatlar, milli mirasymyzy gorap saklamak we ýaş nesilde tebigata söýgi döretmek baradaky pikirler aýratyn nygtaldy. Çagalar dermanlyk ösümlikleriň peýdasy, olary gorap saklamagyň ähmiýeti hem-de tebigy baýlyklarymyza aýawly çemeleşmegiň zerurdygy barada gyzykly maglumatlary uly höwes bilen diňlediler. Şeýle çäreler ýaş nesliň ekologiýa medeniýetini ýokarlandyrmaga, sagdyn durmuş ýörelgelerini wagyz etmäge we milli gymmatlyklarymyza bolan hormaty pugtalandyrmaga ýardam edýär.