TGÝMJ-niň Daşoguz welaýat bölüminiň hünärmenleri we meýletinçileri tarapyndan Bütindünýä çagalary goramak güni mynasybetli Daşoguz şäheriniň                36-njy çagalar bakja-bagynda baýramçylyk çäresi geçirildi. Şatlyk-şowhuna beslenen çärede körpeleriň bagtyýar çagalygyny dabaralandyrýan çykyşlara giň orun berildi. Baýramçylyk çäresiniň dowamynda meýletinçiler tarapyndan taýýarlanan körpeler milli lybaslarda çykyş edip, aýdym-sazlary, şirin tanslary hem-de täsirli sahna çykyşlary bilen gatnaşyjylarda ýakymly täsir galdyrdylar. Körpeleriň şadyýan keşbi, olaryň ukyp-başarnyklarynyň açylmagy we döredijilik mümkinçilikleriniň görkezilmegi çärä aýratyn öwüşgin çaýdy. Şeýle hem çäräniň ahyrynda TGÝMJ-niň Daşoguz welaýat bölümi tarapyndan körpelere süýjülik sowgatlary gowşurylyp, olaryň ýüzlerinde şatlyk duýgulary emele geldi. Şeýle çäreler ýaş nesliň bagtyýar durmuşda ösüp-ulalmagyna, olaryň jemgyýetçilik çärelerine işjeň gatnaşmagyna we watansöýüjilik ruhunda terbiýelenmegine uly ähmiýet berýär.