Golaýda “Mary” myhmanhanasynyň mejlisler zalynda TGÝMJ-niň welaýat bölüminiň gurnamagynda “Ýer titremesiniň ýokary töwekgelçiliginde we Merkezi Aziýanyň tebigy howply ýurtlarynda adatdan daşary ýagdaýlara taýýarlyk görmek we olara garşy göreşmek üçin ýerli we Milli mümkinçilikleri güýçlendirmek” atly taslamasynyň okuw-türgenleşik çäresi geçirildi. Çärä bilim we saglygy goraýyş ulgamlarynyň işgärleri gatnaşdylar. Täsirli geçen çärede TGÝMJ-niň welaýat bölüminiň bölümçe müdiri Muhammetgeldi Allaýarow, Murgap etrabyndaky 14-nji orta mekdebiň mugallymy Atamyrat Akmyradow we beýlekiler çykyş etdiler.

Çykyş edenler adatdan daşary ýagdaýlar dörände ilkinji halas ediş işlerini giňişleýin düşündirdiler. Şeýle-de, Gahryman Arkadagymyzyň, Arkadagly Gahryman Serdarymyzyň saýasynda ýurdumyzyň her bir raýatynyň asuda, eşretli, bagtyýar durmuşda ýaşamagy üçin ähli mümkinçilikleriň durmuşa ornaşdyrylýandygy barada giňişleýin gürrüň berdiler.