Her ýylyň 8-nji maýynda bütin dünýäde Halkara Gyzyl Haç we Gyzyl Ýarymaý Hereketiniň döredilen güni bellenilýär — bu gün dünýäniň iň hormatlanýan we ynsanperwerlik ruhly seneleriniň biridir. Şu sene mynasybetli TGÝMJ-niň Daşoguz welaýat bölüminde döwlet edaralarynyň, jemgyýetçilik guramalarynyň, bilim edaralarynyň gatnaşmagynda tegelek stol duşuşygy geçirildi. Duşuşygyň  maksady — ynsanperwerlik işi babatda hyzmatdaşlygy güýçlendirmek, Gyzyl Haç we Gyzyl Ýarymaý hereketiniň gymmatlyklaryny wagyz etmek, häzirki döwrüň kynçylyklaryny ara alyp maslahatlaşmak we bilelikdäki çözgütleri gözlemekden ybarat boldy. Duşuşygyň dowamynda meýletinçiligi ösdürmek, ilatyň ejiz gatlaklaryna kömek etmek, adatdan daşary ýagdaýlara we tebigy betbagtçylyklara taýýarlyk görmek we olara täsir etmek hem-de halkara ynsanperwer hukugyny wagyz etmek ýaly mowzuklara aýratyn üns berildi. Bu çäre Hereketiň esaslandyryjysy tarapyndan öňe sürlen ynsanperwerlik, tarap çalmazlyk, bitaraplyk we meýletinlik ýörelgeleriniň häzirki zaman dünýäsi üçin hem möhüm we zerurdygyny ýene bir gezek tassyk etdi.