Türkmenistanyň Gyzyl Ýarymaý Milli Jemgyýetiniň ýolbaşçylarynyň Halkara Gyzyl Haç Komitetiniň wekilleri bilen duşuşygy

Türkmenistanyň Gyzyl Ýarymaý Milli Jemgyýetiniň (TGÝMJ) ýolbaşçylary Halkara Gyzyl Haç Komitetiniň (HGHK) Merkezi Aziýadaky Sebitleýin wekilhanasynyň täze bellenen Operasiýalar boýunça ýolbaşçysy hanym Jamila Hammami we HGHK-nyň Türkmenistandaky Missiýasynyň ýolbaşçysy jenap Mihail Rahmanow bilen duşuşyk geçirdi. Duşuşygyň dowamynda taraplar TGÝMJ bilen HGHK-nyň arasynda köp ýyllaryň dowamynda ynsanperwerlik medeniýetini ösdürmäge, halkara ynsanperwerlik hukugy baradaky bilimleri ýaýratmaga we Milli Jemgyýetiň adatdan daşary ýagdaýlara taýýarlygyny ýokarlandyrmaga ýardam edýän ýakymly hyzmatdaşlygy bellediler.

Aýratyn üns halkara ynsanperwerlik hukugynyň ýörelgeleri baradaky bilimleri giňeltmekde, maşgala gatnaşyklaryny dikeltmek boýunça işlerde, şeýle hem ilatyň ejiz toparlaryna kömek etmek we jemgyýetleriň adatdan daşary ýagdaýlara taýýarlygyny ýokarlandyrmak ulgamyndaky özara hereketleri güýçlendirmäge gönükdirildi. TGÝMJ-niň wekilleri halkara ynsanperwer hukuk kadalary barada habardarlygy ýokarlandyrmaga, meýletinçiler, ynsanperwer we harby ýokary okuw mekdepleriniň talyplary, harby gullukçylar üçin okuw maslahatlaryny geçirmäge gönükdirilen Jemgyýetiň häzirki başlangyçlaryny kesgitlediler.

HGHK-nyň wekiliýeti TGÝMJ-niň tagallalaryna ýokary baha berdi we esasy iş ugurlary boýunça Jemgyýete mundan beýläk-de goldaw bermäge taýýardyklaryny bildirdi. Duşuşygyň netijeleri boýunça taraplar halkara ynsanperwer hukuk boýunça bilim bermek, maşgala gatnaşyklaryny dikeltmek, TGÝMJ-niň işgärlerini taýýarlamak, şeýle hem ynsanperwer işiň halkara standartlaryny ornaşdyrmak ulgamyndaky hyzmatdaşlygy giňeltmek baradaky isleglerini tassykladylar.