ÝOL HEREKETINIŇ HOWPSUZLYGY-ÖMRÜMIZIŇ RAHATLYGY

“Garaşsyz, Baky Bitarap Türkmenistan – Bedew batly at-myradyň mekany” yglan edilen 2026-njy ýylyň sentýabr aýynda “Ýol hereketiniň howpsuzlygy-ömrümiziň rahatlygy” atly geçiriljek çäreleri ýokary derejede gurnamak üçin we her bir döwlet gulluklarynyň jogapkär işgärleri asuda ýurdumyzda höküm sürýän abadan durmuş, howpsuz ýaşaýyş üçin iň derwaýys çäreleriň biri bolan wagyz-nesihat çäreleriniň depginini güýçlendirdiler. Türkmenistanyň Gyzyl Ýarymaý Milli jemgyýetiniň Lebap welaýat bölüminiň hünärmenleri hem şu geçirilýän çärelere işjeň gatnaşyp gelýärler.

2026-njy ýylyň maý aýynyň 15-ne Lebap welaýat Polisiýa müdirliginiň Polisiýanyň ýol gözegçiligi gullugynyň, Türkmenistanyň Kärdeşler arkalaşyklarynyň welaýat bölüminiň we Magtymguly adyndaky Ýaşlar guramasynyň welaýat bölüminiň işgärleri bilen bilelikde Türkmenabat şäheriniň 40-njy orta mekdebinde, mekdep okuwçylarynyň gatnaşmagynda ýol hereketiniň howpsuzlygyny berjaý etmek, ýanýodalar boýunça ýöremelidigi, olaryň ýok ýerinde nähili hereket etmelidigi, köçeleri kesip geçmegiň kadalary, ýol belgileriniň aňladýan manysy, ýol yşyklarynyň reňk sazlaşygynda ýerine ýetirmeli hereketler boýunça “Ýol hereketiniň ýaş gözegçileri” atly bäsleşik geçirildi. Gurnalan ýol hereketiniň düzgünlerini aňladýan bäsleşik bolsa okuwçylaryň Polisiýanyň ýol gözegçiligi gullugynyň ýöriteleşdirilen geýimlerini geýip, deň-duşlary bilen ýollardaky hereket, ýol yşyklary we ýol belgileri barada sorag-jogap alyşmagyna, gysgajyk sahnalary ýerine ýetirmegine gollanma boldy. Şeýle çäreleriň geçirilmegi geljekde ýol hereketine gatnaşýan çagalaryň howpsuzlygynyň üpjün edilmegine, olaryň ýol hereketiniň düzgünlerini dogry ýerine ýetirmeklerine ýardam eder.