Daşoguz welaýatynyň Görogly etrabynyň çagalar bagynda şahsy arassaçylyk boýunça okuw sapagy geçirildi.

TGÝMJ-niň Daşoguz welaýat bölüminiň meýletinçileri tarapyndan Görogly etrabynyň 8-nji çagalar bakja bagynyň körpeleriniň arasynda «Arassaçylyk we şahsy arassaçylyk» mowzugy boýunça okuw sapagy geçirildi. Okuw sapagynyň dowamynda meýletinçiler çagalara şahsy arassaçylygy berjaý etmegiň sagdyn durmuş ýörelgesindäki ähmiýeti barada giňişleýin düşündiriş berdiler. Şeýle hem elleri dogry we yzygiderli ýuwmagyň düzgünleri, arassaçylygyň kadalaryny gündelik durmuşda berjaý etmegiň zerurdygy barada gyzykly söhbetdeşlik geçirildi. Amaly görkezmeler arkaly çagalar elleri dogry ýuwmagyň usullaryny özleşdirip, arassaçylyk endiklerini berkitdiler. Çäräniň ahyrynda çagalar öwrenen bilimlerini we endiklerini gündelik durmuşynda ulanjakdyklaryny aýdyp, okuw sapagyna işjeň gatnaşdylar. Şeýle okuw çäreleri ýaş nesilde sagdyn durmuş ýörelgesini kemala getirmäge, şahsy arassaçylyk endiklerini berkitmäge we keselleriň öňüni almaga ýardam berýär.