TGÝMJ-niň Daşoguz welaýat bölümi, Daşoguz welaýat Polisiýa müdirliginiň Ýangyn howpsuzlyk bölüminiň wekilleri bilen bilelikde, Daşoguz şäherindäki «Bagtyýar nesil» çagalar sagaldyş we dynç alyş merkezinde dynç alýan çagalaryň arasynda ýangyn howpsuzlygy boýunça sport bäsleşigini geçirdiler. Çäräniň esasy maksady çagalaryň ýangyn howpsuzlygy baradaky bilimlerini pugtalandyrmak, adatdan daşary ýagdaýlarda dogry hereket etmegiň endiklerini kemala getirmek hem-de olarda howpsuzlyk medeniýetini ösdürmekden ybarat boldy. Sport bäsleşiginiň dowamynda çagalar toparlara bölünip, dürli gyzykly we täsirli ýaryşlara gatnaşdylar. Şeýle hem olar ýangyn söndüriji enjamlary dogry we howpsuz ulanmagyň usullaryny amaly taýdan görkezip, görkezme çykyşlaryny ýerine ýetirdiler. Ýangyn howpsuzlyk gullugynyň hünärmenleri tarapyndan berlen düşündirişler we amaly maslahatlar çagalarda uly gyzyklanma döretdi. Bäsleşik şatlykly we ruhubelent ýagdaýda geçip, gatnaşyjylaryň howpsuzlyk babatdaky bilimlerini has-da baýlaşdyrmaga, jogapkärçilik duýgusyny ösdürmäge hem-de sagdyn durmuş ýörelgelerini wagyz etmäge ýardam berdi.