Türkmenistanyň Gyzyl Ýarymaý Milli jemgyýeti Türkmenistanyň Goranmak ministrliginiň Aşgabat şäher raýat goranyşy we halas ediş işleri müdirligi bilen bilelikde Gökderedäki “Nesil” çagalar sagaldyş we dynç alyş merkezinde “Ýaş halas ediji” atly bäsleşik geçirdi.
Çagalar bäsleşigiň şertleri boýunça şahsy gorag serişdelerini geýmek, ilkinji lukmana çenli kömegi iş ýüzünde görkezmek, ýüz metr aralyga estafeta ylgamak boýunça bäsleşdiler. Sagdyn we berk bedenli, ýokary düzgün nyzamly, maksada okgunly, Watan söýüji ýaş nesilleriň kemala gelmegi dogrusynda anyk mysallar arkaly gyzykly söhbetler edildi. Bu çäre olaryň zähmetsöýer, il halar, Watana wepaly adamlar bolup ýetişmeklerine badalgadyr.
